“Jis bhaasha mein socho, usi bhaasha mein likho!” I believed in it. Main abb bhi is baat ko maanti hoon per aaj se pehle kabhi is per amal nahi kiya. Sochti aaj bhi mein hindi mein hoon, per woh bhaasha abb hindi ki shudhhtha se koso door hai.
Mera bachpan Haryana ke hisar shaher mein guzra, jahaan hindi kaafi had tak Haryanvi se prabhavit rehi. Haalanki mein janm se dakshin bhaartiya hoon,per Punjab, uttar Pradesh, Haryana, rajasthan, himachal yeh sabhi kahin na kahin mujhse jude hain. Mere parivaar mein sabhi aaj bhi hindi mein hi dil ki baat zaahir kerte hain. Per aaj mein sochne per majboor hoon ki kyun, aaj tak kabhi maine hindi mein nahi likha? Niraj, Shaily, Ramdhari singh dinkar, munshi premchand, in sabhi ko maine padhaa per kabhi inko apne favourite books ki category mein nahi daala. Woh kya baat hai jo jane austen, Shakespeare, salman rushdie yaa kisi bhi English bhaasha ke writer ko in sabhi mahaan lekhakon se alag kerti hai? Main maanti hoon ki English ek antar-rashtriya bhasha hai jo hamein seemaon ko bhula ker, aapsi mel jhol mein madat kerti hai. Kaafi NRI yeh maanege ki her kisi ‘asian origin’ ke vyakti ko dekhker , zabaan khud hindi mein baat kerne lagti hai. Chahe woh Pakistani, Bangladeshi yaa nepali hi kyon naa ho. Maine tho kai baar dakshin bhartiyo se bhi puchha hoga, do you know hindi? Shaayad main abb bhi hindi mein hi comfortable hoon.
Aisa nahi hai, ki aaj ke baad mein sirf hindi mein hi likhoongi, per yeh ek sawaal hai apne aap se, ki kyun mein apni pyaari hindi ko bhool jaati hoon. Yeh achha hai ki aap zyaada bhashaon ko jaane; unka prayog karen per jo aapka hai usko naa bhoolen. Agli baar yeh koshish zaroor rahegi ki India jaaker English ko kuch der door ker, apni bhaasha mein baat karoon. Jis bhaasha mein sochoon usi mein baat karoon, Hinglish bhi chalegi!
PS: Please don’t brand me shiv sainik, this is just an emotionally motivated piece.
Nice thought, very nice. Mein dono languages mein sochti hoon, strangely but when I am with my parents and in Hisar I automatically switch to hindi. It is my effort to teach my son Hindi, he speaks but is not confident enough. But he makes the effort. I crave to speak the language sometimes ..But I have recently got myself a whole lot of literature, Urdu and hindi..It is nice and keeps me quite connected. I liked this post.
ReplyDelete